Mánudagur - Nú lofa ég bót og betrun

Hef engu nennt síðustu vikur. Fyrirheit að morgni, fyrirheit um miðjan dag og að kvöldi. Hef afsakanir en þær eru haldlausar. Á morgun, eða hinn, verður eitthvað gert. Býst við hinn - upphitun og vöðvamennt við þvottavélaburð á morgun. Af hreyfingaleysi er meistarinn orðin aumur í skrokk og axlarmein máttleysa hann. Ef hlaupið skal í haustmaraþoni, eitt hálft, eða í Powerade, verður hlunkurinn að fara út.

Þriðjudagur - Rok og rigning, aðeins synt

Fór ekki út að hlaupa í rigningunni og rokinu, fyrsta alvöru lægðin og stormviðvörun. Fólk beðið að vera ekki á ferð að óþörfu. Áður en allt varð vitlaust fór ég með dóttur og frænku á sundæfingu. Meðan þær busluðu synti ég eins og áður heila 500 metra með bringusundslagi. Tæknin er ugglaust afspyrnu léleg og kannski spyr ég ráða hjá gömlum sundþjálfurum sonarins um tækni og annað. Reyndi aðeins að synda skriðsund og það var nú eins og maðurinn væri að drukkna. Veit ekki hvað ég geri á morgun; líklega hlaupið en það fer allt eftir veðri.

Mánudagur - Þungur í fratleik

Dagsskipunin var "fartlek" sem eru víst nokkurs konar rykkingar og rokur, frjálst rösklegt flæði á hlaupum. Kannski er ég að misskilja þetta sem ég hef aldrei reynt og vissi varla hvað gera skyldi. Það var kannski allt í lagi að vita ekki neitt, þungur á mér eftir viku hvíld og fast mér þetta því hálfgerður fratleikur. Ég hitaði upp og hljóp upp í Setberg. Rykkti á milli staura, jók hraða, hægði á og fór svo stundum að ég stoppaði. Eftir þetta voru, með upphitun og niðurskokki, næstum 13 kílómetrar að baki. 

Fimmtudagur - Ekki hlaupið enn

Ákvað að hafa þessa viku hvíldarviku frá hlaupum og gera eitthvað annað. Dóttirin er á sundæfingum á fimmtudögum og í morgun þegar ég tók saman hennar dót fyrir skóla og æfingu setti ég mínar sundbrækur, brillur og handklæði í tösku þannig að ekki yrði aftur snúið. Viti menn, viti menn: ég synti mitt lengsta sund í langa tíma, og hafa skal í huga að allar vegalengdir eru afstæðar; 500 metrar með kollabringuhætti.

Þriðjudagur - Latur til hlaupa

Er latur að hlaupa þessa dagana. Fór út í rigninguna og hljóp aðeins um bæinn, eymingjalgan hring, en það er varla til frásagna. Kannski reyni ég aftur í kvöld.

Laugardagur - Reykjanesmaraþon PB 1:46:11 og silfur

Í stuttu máli þá hljóp ég, þetta fjórða hálfa maraþon, betur en síðast. Bætti tímann um nokkra tugi sekúndna. Núna 1:46:11 (1:46:56). Ég ætlaði að fara á 1:45, og var nærri því, en það tókst ekki. Kenni ég Grænás-brekku um. Mest best var; ég fékk verðlaun, silfur í mínum aldursflokki. Brautin er skemmtileg og reyndu brekkurnar tvær á; sérstaklega sú Grænás. Þegar ég kom upp hana, og allur mótvindur var að baki, þá lét ég gossa og gaf í. Annars leið mér bara vel í þessu hlaupi og mæti örugglega að ári.

Á morgun verður hvílt og svo verður hlaupið á ný á mánudaginn.

Miðvikudagur - Rösklegt hlaup

Þetta var rösklegt hlaup, ekki langt en ákveðið: Næstum fimm km. og hlaupataktur 4:55 mín/km. Þá ver líka hitað upp og "niðurskokk", fáranlegt að segja svona, eða þá "hlaupið niður". Í upphafi var ég svolítið þreyttur og með fótaverk; þetta hvarf þegar á leið. Eins og alltaf reyni ég, þegar hlaupi er lokið, að teygja þetta úr mér.

Á morgun verður hvílt og svo rólegt á föstudaginn. Gæli enn við að hlaupa hálft á laugardaginn og þá á Reykjanesi. Ef verkur í hælsbót hverfur þá fer ég kappsfullur af stað.

Þriðjudagur - Langt hvíldarhlaup

Eftir sprettina í gærkvöldi lág fyrir mér að hlaupa langt hvíldarhlaup, og má jafnvel kalla það millilangt, næstum 15 km. Þetta gerði ég og hlaupatakturinn var um 5:48 mín/km. Ég komst ekki út fyrr en seint og þetta var þægilegt hlaup mest allan tímann. Síðustu tveir kílómetrarnir voru erfiðir því öll orka var næstum búin.

Á morgun verður rösklegt hlaup en ekki langt. Svo þarf ég að gera það upp við mig hvað ég geri á laugardaginn. Fer ég hálft maraþon á Selfossi eða í Reykjanesbæ. Þá skiptir líka máli í hvaða formi ég verð.

Mánudagur - Löng hröð hlaup á mánudögum

Á mánudögum, ef allt er í lagi, er sprett úr spori. Finnst sem ég komi bara undarlega góður eftir langa hlaupið á laugardaginn; engir strengir og engar harðsperrur. Var, sannarlega, ekki svona síðasta mánudag eftir mitt hálfa maraþon. Svo eitthvað hlýt ég að styrkjast við framtakið.

Ég hljóp þrem sinnum hálfa aðra mílu, 2,4 km., með hvíld á milli. Fór þetta með vaxandi hraða, eða kannski bara þann síðasta: nokkuð hratt.

Tölurnar eru svona, og verð ég að segja að hlaupadagbókin er alltaf að verða betri og betri.

1600 - 9:47 - 6:06 mín/km = 9.81 km/t - Upphitun
2410 - 11:26 - 4:44 mín/km = 12.65 km/t - Sprett úr spori
400 - 2:55 - 7:17 mín/km = 8.23 km/t - Hvíld
2410 - 11:34 - 4:47 mín/km = 12.5 km/t - Sprett úr spori
400 - 3:01 - 7:32 mín/km = 7.96 km/t - Hvíld
2410 -11:12 - 4:38 mín/km = 12.91 km/t - Sprett úr spori
400 - 2:39 - 6:37 mín/km = 9.06 km/t - Hvíld
1600 - 9:34 - 5:58 mín/km = 10.03 km/t - Niðurskokk

Á morgun verður rólegt langt, millilangt. Þá geri ég upp við mig hvað verður gert um helgina. Hálft á Reykjanesi eða á Selfossi.

Laugardagur - Hlaupið um allan Hafnarfjörð

Er hálf vankaður enn, þótt nokkrir klukkutímar séu liðnir. Ég fór út í rigninguna í morgun og hljóp af stað. Þykist ætla að halda æfingaráætluninni til streitu. Fyrir mér lág að hlaupa 18 mílur, sem eru næstum 29 km. Þetta er með mínum lengstu hlaupum og ég fór út um allt. Fann göngu- og hjólastíg út að álveri. Á leið minni meðfram golfvellinum fuku regnhlífar út á sjó; átti ég fótum mínum fjör að launa.

Þegar ég kom heim eftir hlaupið, var eflaust öll orka búin í fótunum og mig verkjaði óstjórnlega - sveið af þreytu - undarlegur verkur. Það lagaðist eftir að ég borðaði, nokkrar kolvetnisbombur, og drakk ávaxtasafa. Þegar ég var búin að jafna mig og "ferðafær" fór ég í sund; hitaði vöðva og teygði létt. Hélt svo áfram að borða.

Á hlaupi mínu hitti ég Stein járnkarl; hann er að hlaupa sig niður fyrir keppnina í Köln. Það verður gaman að fylgjast með þeim köppum þar næsta sunnudag.