Mánudagur - Miðnætur, Jónsmessu ellegar Powerade : 47:05 PB

Bætti tíma minn! Æfingar skila árangri! Þetta var þó ekki þrautarlaust!

Fyrr um daginn fór ég og hitti sjúkraþjálfarann minn sem hefir öðru hvoru tekið skrokkinn og hert á honum eða slakað á; allt eftir því sem við á. Nú var það IT-bandið bilaða; hann nuddaði þetta og ýtti á auma bletti. Ég fékk haffærnisskírteini og umliggjandi vöðvar "teipaðir" - það er víst gert við alvöru íþróttamenn. 

Annars var hlaupið með þessum hætti. Fór af stað og kom i mark. Seinni hringurinn var erfiðari en  fyrri - farið að draga að manni. Brekkurnar erfiðari en sléttlendið og ég fann hvernig dróg úr hraða er haldið var upp þær. Sést vel á 3ja og 8da km, þar sem hlaupatakturinn fellur. Þegar nálgaðist markið gaf ég í og er nokkuð ánægður með 4:17.

Annars var hlaupatakur fyrir hvern kílómetra svona:

1 - 4:38
2 - 4:35
3 - 4:47
4 - 4:42
5 - 4:33
6 - 4:50
7 - 4:35
8 - 4:50
9 - 4:46
10 - 4:17

Á morgun verður leti. 

Laugardagur - Langt hlaup upp að Helgafelli og ný leið til baka

Langt hlaup upp að Helgafelli og nýir malarstígar til baka; mjög skemmtileg leið. Hljóp þó ekki alveg til enda, fyrir lá að fara 25 en þeir urðu 19. Verkurinn í utanverðri mjöðm tók sig upp og ég vildi ekki ofgera IT-bandi sem lét finna fyrir sér, eins og áður, þegar u.þ.b. 15 km voru að baki. Svo ég, nokkuð aumingjalegur í hlaupabrók, tók strætó heim af Völlunum. Hlaupataktur 5:56 og púls 149. Allt þetta er svo sem á réttri leið.

Á mánudagsmorguninn verður IT-bandið rannsakað af sjúkraþjálfara. Kannski fæ ég haffærniskírteini!

Á morgun, sunnudag, verður hvílt. Veit ei með Jónsmessuhlaupið á mánudag. Hljóp það síðast 2003, var mitt fyrsta tímatökuhlaup sællar minningar.

Annars lágu að baki, í þessari viku, 51,9 km. Síðasta 49,9.

Fimmtudagur - Rösklegt hlaup

Átti að hlaupa í gærkvöldi en var í afmæli og hafði ekki lyst á að ropa rjóma! Í staðinn fór ég út í kvöld eftir að hafa lagt mig yfir fótboltaleik kvöldsins. Sonurinn kallaði það "pávernapp"! Hljóp rösklega rúma 11 km og hlaupatakturinn var 5:12 mín/km. Gerði hlé eftir hverja fjóra km og teygði. Líst illa á að verkurinn í utanverðri mjöðm vex þegar ég hefi hlaupið næstum 10 km! Held áfram að teygja á mjöðm og IT-bandi, eða hvað það heitir nú.

Á þessari stundu veit ég ekki hvor ég mun hlaupa mitt langa hlaup á laugardaginn, mun meta það eftir rólegt hlaupa á morgun. Set hér til viðmiðunar hlaupataktinn.

rólegt (easy) 6:14-6:01 mín /km
hægt (slow) 6:05-5:52 mín/km
jafnt (steady) 5:26-5:14 mín/km
rösklega (brisk) 5:13-5:01 mín/km
hratt (fast) 5:01-4:48 mín/km

Þriðjudagur - Lýðveldishlaup

Eftir að hafa farið með dóttur í hoppukastala, fyrr um morgunin, fór ég og hljóp rólega um bæinn eina 13 km á meðan mæðgur tóku þátt í skrúðgöngu. Fann ekki ólina fyrir púlsmælinn en hlaupataktur var nálægt því sem mér var uppálagt, 5:42 mín/km, átti að vera 5:52-6:05. Þegar ég kom heim var ég ótrúlega svangur, hafði ekkert borðað að ráði um daginn: át súkkulaðikex og drakk mjólk. Þeir segja víst einhverjir að mjólk sé góð eftir hlaup - hún rann hið minnsta mjög hratt niður. Á morgun verða það næstum 12 km rösklega hlaupnir.

Mánudagur - Sprettir 9*400

Á mánudögum er ég hetja! Þá gerast undur og stórmerki! Hetjan fer og gerir alvöru hlaupaæfingar. Í dag voru það sprettir (skuld frá í síðustu viku) - ég nennti ekki að leita að brekku fyrir brekkuspretti, sem var dagskipunin.  Alvöru hlauparar, sem gera spretti, finna sér hlaupabraut og ég nota Kaplakrika. Þar lágu í valnum níu sinnum 400 metrar og hlaupatakturinn á bilinu 4:38-4:25 mín/km. Kom mér á óvart hve þetta var auðvelt - alltaf sama grobbið - annars örlítill verkur í hásin í lokin og, eins og nú í langan tíma, verkur í öxl; reyndi að vera beinn í baki.

Annars eru tölurnar þessar. Fyrst tíminn sem það tók mig að hlaupa hverja 400 metra og svo hlaupataktur:

1. 1:46 mín. - 4:26 mín/km
2. 1:45 mín. - 4:25 mín/km
3. 1:48 mín. - 4:31 mín/km
4. 1:47 mín. - 4:29 mín/km
5. 1:46 mín. - 4:26 mín/km
6. 1:49 mín. - 4:33 mín/km
7. 1:46 mín. - 4:27 mín/km
8. 1:44 mín. - 4:22 mín/km
9. 1:46 mín. - 4:26 mín/km

Á morgun verða svo næstum 13 km rólega. 

Laugardagur - Vatn sókt í vatnsbólið í Káldárseli

Fyrir lág að hlaupa langt, 22,5 km á rólegum hraða. Þegar ég kom út, í frábært hlaupaveður, ákvað ég að fara í áttina að Kaldárseli og jafnvel upp að Helgafelli. Hefi aldrei farið þangað hlaupandi en vissi að þetta væri skemmtileg leið, margir stígar, brekkur og ferskt vatn á leiðinni. Á leið minni hitti gegnum Setbergið ég Stein þríþrautarkappa sem var að liðka sig fyrir morgundaginn þegar hinn fyrsti hafnfirzkri hálfi járnmaður verður þreyttur.

Hlaupið var alveg ágætt svona til að byrja með en síðustu þrír km voru erfiðir; verkurinn í IT-bandi ágerðist nokkuð en hvarf fljótt eftir að ég kláraði. Verð að teygja á þessu bandi. Ég reyndi að halda hlaupatakti innan marka 6:05-5:52 mín/km, og var á endanum 5:44 og púls var 154. Þegar hlaupi lauk fór ég með dótturinni í sund; hún lék sér en ég teygði í potti.

Annars er vikan 49,9 km.  

Á morgun verð ég starfsmaður í hálfu þríþrautinni en hleyp næst á mánudaginn.  

Föstudagur - Rólegt um bæinn og langt á morgun

Hljóp rólega upp í Setberg og til baka, 6,5 km. Það sem er merkilegast er að mér tókst að hlaupa innan marka, á bilinu 6:14-6:02 mín/km, var á 6:11. Púlsinn var lágur, er kannski að komast í þokkalegt form: 139.

Á morgun verður langt hægt hlaup, 22,5 km. Fer kannski í áttina að Helgafelli eða Heiðmörk. Á sunnudaginn gerist ég sjálfboðaliði og hjálpa til við hálfan hafnfirzkan járnmann.

Miðvikudagur - Rösklegt um bæinn

Ég undirbjó mig betur en oft áður fyrir þetta rösklega hlaup. Hefi verið með verk í mjöðm. Í allan dag hitaði ég og kældi þetta eymdarsvæði. Þegar ég hljóp rólega eina mílu í upphafi fylgdist ég vel með hvort verkurinn kæmi aftur, svo var ekki og þá var gefið í - 6,44 km á hlaupatakti 5:02 mín/km  og púls 164. Þegar hlaupi lauk verkjaði mig ögn; held að ég verði að gera eitthvað róttækt til að losna við þetta. Enda teygði ég vel þegar ég kom heim. Á morgun verður hvílt og svo rólegt á föstudaginn og langt á laugardaginn.

Hafa lesendur lent í vandræðum með samskipti Garms og tölvu. Tölvan hleður Garminn en sendir ekki upplýsingar í forritið. Þekkir ekki tækið og fleira af slíkum toga.

Þriðjudagur - Á Álftanesi eru kríur

Kom heim frá Tenerife um miðjan dag og fannst ég yrði að fara út að hlaupa - sukkjöfnun og afeitrun eftir óreglu í mat og drykk. Enda er ég þremur kílóum þyngri en þegar ég fór. Tek líka fram að ég er enn of þungur.

Ég sleppti sprettum í gær í hitanum á Tenerife en ekki má sleppa hlaupum dag eftir dag. Fyrir lág að hlaupa sjö mílur hægt. Fór út á stuttbuxum - varð að sýna umheiminum hve hraustlegur ég er eftir sólböðin og strandhlaupin - og lagði í hann. Leiðin lá út á Álftanes - stóra hringinn - sem er um tíu km. Þegar ég kom út á nesið mættu mér kríur, sem voru ekki þar fyrir nokkrum vikum, og minntist ég þess er hljóp þar fyrir nokkrum árum og gegnum þétt varplendi. Kríurnar voru alls ekki ánægðar með að ég væri að álpast þarna og steyptu sér ótt og títt að kolli mér. Á þeim tíma var ég með púlsmæli, eins og nú, og þegar kríurnar steyptu sér yfir mig þá rauk púlsinn upp. Ekki ætla ég að endurtaka þennan leik, að láta kríurnar hrella mig. Finn mér aðra leið.

Annars eru tölurnar þessar: 11,27 km. Hlaupatakur 5:54 mín/km. Púls 137. 

Laugardagur - Strandvörðurinn Örn elding á hlaupum

Sönn hetja fór út og hljóp meðfram ströndinni - var þó ekki í rauðri brók eins og strandvörðurinn Hasselhoff. Fyrir lág að hlaupa 12 mílur (19,31 km) á rólegum hraða og vissi hetjan að þetta gæti hún en yrði að gera þetta í áföngum. Hitinn var um 28°C, en engin sól - kannski ágætt - og því ákvað hetjan að skipta þessu upp í nokkra áfanga, þrjá km hvern þeirra. Fyrstu 10 km voru erfiðir, ætli líkaminn hafi ekki verið að venjast þessu - en þegar hlaupið var hálfnað þá varð þetta auðveldara. Í hvert skipti sem ég stoppaði, eftir u.þ.b. þrjá km, teygði ég vel og vandlega og drakk. Hlaupatakturinn var 5:45 mín/km (aðeins meiri en til stóð) og púls 151.

Á morgun verður hvílt, veit ekki með sprettina á mánudaginn. Kannski létt hlaup því á þriðjudaginn förum við heim og þá verður ekkert hlaupið.