Miðvikudagur - Rösklegt hlaup

Þetta var rösklegt hlaup, ekki langt en ákveðið: Næstum fimm km. og hlaupataktur 4:55 mín/km. Þá ver líka hitað upp og "niðurskokk", fáranlegt að segja svona, eða þá "hlaupið niður". Í upphafi var ég svolítið þreyttur og með fótaverk; þetta hvarf þegar á leið. Eins og alltaf reyni ég, þegar hlaupi er lokið, að teygja þetta úr mér.

Á morgun verður hvílt og svo rólegt á föstudaginn. Gæli enn við að hlaupa hálft á laugardaginn og þá á Reykjanesi. Ef verkur í hælsbót hverfur þá fer ég kappsfullur af stað.

Þriðjudagur - Langt hvíldarhlaup

Eftir sprettina í gærkvöldi lág fyrir mér að hlaupa langt hvíldarhlaup, og má jafnvel kalla það millilangt, næstum 15 km. Þetta gerði ég og hlaupatakturinn var um 5:48 mín/km. Ég komst ekki út fyrr en seint og þetta var þægilegt hlaup mest allan tímann. Síðustu tveir kílómetrarnir voru erfiðir því öll orka var næstum búin.

Á morgun verður rösklegt hlaup en ekki langt. Svo þarf ég að gera það upp við mig hvað ég geri á laugardaginn. Fer ég hálft maraþon á Selfossi eða í Reykjanesbæ. Þá skiptir líka máli í hvaða formi ég verð.

Mánudagur - Löng hröð hlaup á mánudögum

Á mánudögum, ef allt er í lagi, er sprett úr spori. Finnst sem ég komi bara undarlega góður eftir langa hlaupið á laugardaginn; engir strengir og engar harðsperrur. Var, sannarlega, ekki svona síðasta mánudag eftir mitt hálfa maraþon. Svo eitthvað hlýt ég að styrkjast við framtakið.

Ég hljóp þrem sinnum hálfa aðra mílu, 2,4 km., með hvíld á milli. Fór þetta með vaxandi hraða, eða kannski bara þann síðasta: nokkuð hratt.

Tölurnar eru svona, og verð ég að segja að hlaupadagbókin er alltaf að verða betri og betri.

1600 - 9:47 - 6:06 mín/km = 9.81 km/t - Upphitun
2410 - 11:26 - 4:44 mín/km = 12.65 km/t - Sprett úr spori
400 - 2:55 - 7:17 mín/km = 8.23 km/t - Hvíld
2410 - 11:34 - 4:47 mín/km = 12.5 km/t - Sprett úr spori
400 - 3:01 - 7:32 mín/km = 7.96 km/t - Hvíld
2410 -11:12 - 4:38 mín/km = 12.91 km/t - Sprett úr spori
400 - 2:39 - 6:37 mín/km = 9.06 km/t - Hvíld
1600 - 9:34 - 5:58 mín/km = 10.03 km/t - Niðurskokk

Á morgun verður rólegt langt, millilangt. Þá geri ég upp við mig hvað verður gert um helgina. Hálft á Reykjanesi eða á Selfossi.

Laugardagur - Hlaupið um allan Hafnarfjörð

Er hálf vankaður enn, þótt nokkrir klukkutímar séu liðnir. Ég fór út í rigninguna í morgun og hljóp af stað. Þykist ætla að halda æfingaráætluninni til streitu. Fyrir mér lág að hlaupa 18 mílur, sem eru næstum 29 km. Þetta er með mínum lengstu hlaupum og ég fór út um allt. Fann göngu- og hjólastíg út að álveri. Á leið minni meðfram golfvellinum fuku regnhlífar út á sjó; átti ég fótum mínum fjör að launa.

Þegar ég kom heim eftir hlaupið, var eflaust öll orka búin í fótunum og mig verkjaði óstjórnlega - sveið af þreytu - undarlegur verkur. Það lagaðist eftir að ég borðaði, nokkrar kolvetnisbombur, og drakk ávaxtasafa. Þegar ég var búin að jafna mig og "ferðafær" fór ég í sund; hitaði vöðva og teygði létt. Hélt svo áfram að borða.

Á hlaupi mínu hitti ég Stein járnkarl; hann er að hlaupa sig niður fyrir keppnina í Köln. Það verður gaman að fylgjast með þeim köppum þar næsta sunnudag. 

Miðvikudagur - Annar í endurhæfingu

Eftir nokkra umhugsun, teygjur og fettur, fór ég út að hlaupa - var uppfullur af þjóðrembu eftir hyllingarhátíð við Arnarhól og orðuveitingu, og ég dóttirin sungum hástöfum, með landslýð, fyrir framan sjónvarpið, lagið sem allir þekkja: Öxar við ána, og sonurinn, sem var á leiðinni á handboltaæfi,ngu sagði: þið eruð klikk. Hlaupið var rólegt, lykkjur og útúrdúrar um Hafnarfjörð. Næstum þrettán kílómetrar og hlaupatakturinn um 5:51 mín/km. Næst verður, líklegast, hlaupið á föstudag.

Á hlaupunum, velti ég því fyrir mér hvort það væri nú ekki ráð að blekkja sig - leggja gildru, egna fyrir mig gulrót og verðlauna - fara í íþróttahúsið og gera styrkjandi æfingar. Belgsmörinn hverfur ekki og alltaf er ég jafn þungur. Þarf að koma mér upp einhverju kerfi og svo að ákveða hvað skuli vera í verðlaun.

Þriðjudagur - Ónot í læri

Finn fyrir verk aftan í læri - þið hefðuð átt að sjá mig hlaupa á eftir strætó í dag - og að verkjarins sökum fór ég því í sund í stað þess að hlaupa. Ekki var mikið synt, þrátt fyrir fögur fyrirheit, en þess heldur legið í potti og hitað. Er heitur þá reyndi stirðbusinn sig við teygjur. Eftir því sem á leið, og ég varð heitari, þá lagaðist verkurinn. Lifi ég í von að þar sé allt ónotalegt að hverfa úr mér. Þessi sami verkur hefur áður leikið með mig og hann er aðeins vegna stirðbusaháttar.

Sé til með hlaup á morgun!

Mánudagur - Skakklappast með harðsperrum um bæinn

Áður en ég mætti í kökuafmæli skakklappaðist ég um bæinn, mjög rólega, til að ná úr mér harðsperrum dauðans. Í dag, og í gær, var mér erfitt um gang - aðeins harðsperrur, sem betur fer, að ég held - og að labba niður stiga var hin mesta þolraun. Nú, þegar ég hefi hlaupið 6,5 km. á rólegum takti 6:11 mín/km, er ég betri en áður. - Á morgun ætla ég að hlaupa aftur, kannski fer ég lengra, en held að ég auki ekkert hraðann.

Laugardagur - Þriðja hálfa maraþonið

Þreytti mitt þriðja hálfa maraþon rétt í þessu. Tíminn var 1:53:58 og hlaupatakturinn, að jafnaði, 5:21 mín/km. Hann sveiflaðist mjög mikið frá 4:45 og 6:53. Í upphafi hlaups var markið sett hátt, hetjan ætlaði sér að hlaupa á 1:40 klst. og til þess hefði hlaupatakturinn átt að vera, að jafnaði 4:45 mín/km, en fljótlega kom í ljós að ég myndi ekki ná því - ætlaði að bæta minn síðasta tíma um þónokkrar mínútur en var langt frá því. Ég hef áður hlaupið hálft á 1:49 (2003) og 1:47 (2008). Á einum stað á leiðinni - upp brekkuna þegar komið var af hafnarsvæðinu - þvarr mér þrek og ég gekk, það var þegar takturinn fór í næstum sjö mínútur með kílómetrann. Svo þegar ég kom upp brekkuna þá vissi ég að aðeins væri hlaupið niður á við og á jafnsléttu og varð léttari í skrefi.

Eitt var alveg ótrúlegt en það var þegar kappinn sem varð í fyrsta sæti mætti okkur áhugamönnunum. Hann þaut áfram og virtist ekkert hafa fyrir þessu. 

Núna eftir hlaupið er líðanin ágæt - um stutta stund, í upphafi hlaups, fann ég fyrir verk í hásin og sköflungi en það hvarf. Annars er núna aðeins þreytuverkur í hælsbót sem vonandi hverfur fljótt. Í hlaupinu gerð ég mér far um að stoppa á drykkjarstöðvum, fékk mér vatn og orkugel; ef ég hefði ekki stoppað svo lengi við það hefði tíminn kannski orðið betri en efa það. Þá hefði engin orka verið til að hlaupa. Þá tókst mér að sækja fallega og stóra blöðru og ætla ég að láta hana alveg vera.

Á morgun verður farið í sund og svo haldið áfram að æfa og kannski kemst ég einhvern tímann á þeim tíma sem ég ætlaði í dag. 

Opinber tími: 1:53:48 (1:52:58)

450. sæti af 1264.

111. sæti af 207 í aldursflokki 40-49 ára. 

Miðvikudagur - Stutt hlaup og karbódrykkir

Þetta var stutt hlaup - fimm kílómetrar - að heiman og heim. Fór rólega eins og mér var uppálagt. Einn ljóður var á hlaupinu, verkur í sköflungi en hann fór á þriðja kílómetra. Vonandi verð ég verkjalaus á laugardaginn. Ég hef verið duglegur að gera bolteygjur og hamstrengs, allt í þeirri von að þetta bæti mig. Ég keypti dunk af "karbó" sem ég drekk nú skv. fyrirmælum.

Þriðjudagur - Rólegt hlaup til liðkunar

Þetta var rólegt hlaup með fram ströndinni til liðkunar með dóttur, hún hjólaði og ég hljóp "rólega". Ég ætlaði að fara hægar yfir en hún hjólaði hratt að ég varð að fara fór hraðar en stóð til. Þegar hlaupi lauk fórum við heim, að borða borðuðum og síðan í sund. Helda áfram að teygja á skrokk, sérstaklega á lendarvöðvum og hamstreng hægri fótar. Síðar í dag ætla ég að kaupa eitthvert "karbóduft".