Sunnudagur - Gamli hringurinn og Gangvirkið

Fór út um hádegisbil, en nennti varla, og hljóp í rúman hálftíma, 33 mínútur; skuldaði nokkrar mínútur. Fór gamla hringinn sem er um hálfur sjötti kílómetri. Stoppaði tvívegis og teygði á kálfum og hásin.

Á orðið auðveldara með að hlaupa út að "draugahúsi" á innan við 10 mínútum og til þess þarf að gefa í á Herjólfsbraut; þetta hefir verið eitt af markmiðunum frá því ég hóf hlaup að nýju. Næsta markmið er að komast út að bakaríi á horni Strandgötu og Lækjargötu á innan við 15 mínútum; það ætti að takast mjög fljótlega, næst verða það gatnamótin á Austurgötu og Lækjargötu eða Hverfisgötu. Allt verður þetta að gerast innan há- og lámarka púlsmælis.

Finn fyrir þreytu í hásin. Gætti mín á að hita hana áður en ég fór af stað, notaði til þess hitapoka, teygði vandlega á leiðinni og aftur þegar ég kom heim.

Á leiðinni var ég með tónhlöðunginn, eins og oft þegar ég hleyp einn, og hlustaði á Gangvirkið sögu eftir Ólafs Jóhanns Sigurðssonar frá árinu 1955 í upplestri Þorsteins Gunnarssonar. Söguna sótti ég á hlaðvarpssíðu RÚV. Frábært framtak hjá þeim að gera efni aðgengilegt; finnst þó að nýir þættir mættu vera þar, er þó alls ekki að lasta það sem er komið. Sagan er skemmtileg ádeila á íslenskt samfélag og á alveg við í dag; en samt finnst mér sveitarómantíkin - eða hvernig Páll Jónsson - horfir heim í sveitina hallærisleg (veit nú samt ekki hvað ég er að segja hér getur verið að ég breyti því og kann að vera að það sé hluti af ádeilunni).

Hér í lokin koma tölur fyrir vikuna og undangengnar vikur. Þessi vika - nr. 31 - ber af. Í fyrsta lagi, tók þátt í tímatökuhlaupi, hljóp á betri tíma en ég átti vona á - 5 km á 24:10, og braut 30 km múrinn. Hvað gerist í næstu viku á eftir að koma í ljós. Kem ég mér út í sundlaugina í Garðabæ? Það þýðir að ég þarf að hætta í vinnunni klukkan fjögur og leggja af stað heiman frá mér klukkan fimm; það yrði nú bara ágæt upphitun.

31: 5 - 3:14 - 32,9 - 3.284

30: 4 - 2:37 - 22,3 - 2.344 

29: 2 - 1:20 - 11,0 - 1.260 

26: 3 - 1:41 - 15,9 - 1.495 

25: 5 - 2:41 - 26,3 - 2.489

 

Laugardagur - Haldið á Holtið

Áætlun boðaði hlaup í 45 mínútur en þær urðu 56, aðallega því ég stefndi á Holtið og vegalengdin var lengri en gamli hringurinn. Rúmlega 9 km. Áður en ég fór af stað hitaði ég hásin og bar á hana hitakrem. Ráð frá gamalreyndum íþróttamanni sem hefur átt í við hásinarvanda að etja. Þegar hún var orðin heit teygði ég á. 

Eftir hlaupið fór ég með dóttur og vinkonu hennar í sund. Þar reyndi ég að teygja. Í lauginni hitti ég einn af hlaupurum Hafnarfjarðar, ritara Félags maraþonhlaupara. Ég hefi um nokkurn tíma fylgst með hlaupadagbók hans á netinu. Hann og flokkur annarra - Skokkhópur Garðabæjar - hlaupa hér um nærsveitir og spurning hvort ég taki þátt, þá mæti ég um hálf sex við sundlaugina í Garðabæ. Hleyp heiman frá mér og út í Garðabæ. Veit að ég þarf að auka hraðann og bæta tækni; það gerist kannski með því að hlaupa með öðrum.

Skulda enn nokkrar mínútur og ef veðrið verður gott á morgun þá fer ég ásamt dóttur stuttan hring. 

 

Þórsdagur - Vatnsmýrarhlaup

Lauk hlaupi! Tíminn var 24:10, síðast 22:01 og þá í miklu betra formi. Nú varð ég í 87da sæti af 217. Síðasti kílómetrinn var erfiður en þegar ég sá endamarkið gaf ég í. Skrokkur var í ágætu formi; hásin í lagi en verkur í herðum. Sá nokkra sveitunga mína. Dóttir og móðir komu með og horfðu á. Nú er næst að hlaupa 10 km í Reykjavíkurmaraþoni þann 18. ágúst. 

Spurning hvort ég æfi eitthvað á morgun eða hvíli. Sé til þegar kvölda tekur.