Mánudagur - Kálfur sporlétti á Kapla með boltakellum

Kálfur hljóp sex 800 metra spretti (tók þá ekki eins og stundum er sagt). Hann fór upp í Kaplakrika á frjálsíþróttabrautina, sem var snævi þakin, og þar hafði hann tækifæri til að glenna sig - í kvöld voru fótboltastúlkur að hlaupa. Hann æstist allur við þetta, eins og þegar boltadrengirnir voru að reyna sig, og tók sporléttur fram úr þeim við hvert tækifæri sem gafst.

Ég bar sprettina í dag saman við þá sem ég hljóp í lok janúar og sýnist mér að púlsinn hafi fallið að jafnaði um tíu slög og hraðinn aukist töluvert. Núna var hlaupatakturinn að meðaltali um 4:39 en þá um 4:52. Hraðast fór ég vegalengdina núna 3:29 mín en síðast 3:40 og ég að dauða kominn þegar því lauk. 

Skrokkurinn var þokkalegur - nema mig verkja ögn í sköflung í upphafi og kálfur var stífur og ég gat nú ekki alveg beitt mér. Þarf að finna eitthvað til að losa um þennan auma vöðva. Þetta mein skal burtreka.

Á morgun, skal ég samkvæmt áætlun, hlaupa rólega, eina átta kílómetra. Vonandi tekst mér það áfallalaust, á miðvikudaginn skal fara rösklega eina sextán en um helgina eru það þrjátíu kílómetra sem er mælikvarðinn um að ég geti hlaupið mitt heila maraþon í lok næsta mánaðar.

Athugasemdir

[Skúli Sæland (IP-tala skráð) 24.3.2009 kl. 23:09]

Blessaður.

 Var að uppgvöta þessa skemmtilegu hlaupasíðu hjá þér. Flott framtak.

 Verð að vísu að segja að það er dagljóst í hverju árangur þinn er fólginn þennan daginn. Innan um fótboltastúlkurnar héldu þér engin bönd og öll fyrri viðmið hrunin. Væri ekki hissa þó þú værir lurkum laminn degi síðar ;-)

 Bkv.

Skúli